♠ The Next Social Experiment

နောက် ၅ ရက် ကျော်သွားတယ်၊ ၆ ကားမပြည့်တပြည့် ကြည့်ဖြစ်တယ်၊ အဲဒီထဲက ၃ ကားကို ချရေးလိုက်ပါတယ်။ အသက် ကြီးလာတော့ မေ့တာမြန်တယ်လေ (ဆွေးဆွေးမြေ့မြေ့ပြော)။


1. The Next Three Days (2010)

ပြင်သစ်ကား Anything for Her ကို ပြန်ရိုက်ထားတာ။ ယောက်ျားကောင်း ယောက်ျားမြတ်တို့မည်သည် မိန်းမက လူသတ်မှုနဲ့ ထောင်ထဲမှာ ငုတ်တုတ်ထိုင်နေသည့်တိုင် သင်္ကာမကင်း လုံးဝ လုံးဝ မဖြစ်ရတဲ့။ အဲ၊ မဖြစ်ရတဲ့အပြင် မရ ရတဲ့နည်းနဲ့ ကယ်ထုတ်ရမည် တဲ့။ ဒါက ဒီကားပြောချင်တဲ့ အဓိကအချက်ပဲ :p အင်း၊ ခြုံပြောရရင် ကြည့်ပျော်ပါတယ်၊ အသည်းတယားယားပဲ၊ ရိုးရိုးသားသား ကျောင်းဆရာကြီးက ထောင်ဖောက်တဲ့ Scoldfield နီးပါး တော်နေတာကတော့ ယုတ္တိမရှိဘူး။

Russell Crowe ကို ဒီလိုဇာတ်လမ်းနဲ့ ပြန်ကြည့်ရတော့ Gladiator ထဲက မိန်းမနဲ့ သားကို အရမ်းချစ်တဲ့ ဗိုလ်ချုပ် Maximus ကို သတိရစေတယ်၊ အဲဒီကားကို ရှယ်ကြိုက်တယ်ဗျာ၊ ပြန်ကြည့်ချင်သေးတယ်။


2. The Social Network (2010)

ဘုရင့်မိန့်ခွန်းလိုပဲ ဖြစ်ရပ်မှန်ဇာတ်လမ်းကို ပြန်ရိုက်ထားတာ၊ ဒါပေမဲ့ ဒီကားကတော့ လူငယ်ပိုင်းတွေ ပိုကြိုက်မယ်ထင်တယ်။ ငါလည်း တချိန်မှာ ဒီလိုဖြစ်နိုင်တာပဲ ဆိုတဲ့ အတွေးမျိုးတွေ အိပ်မက်မျိုးတွေ ပေးစွမ်းနိုင်တဲ့ ရုပ်ရှင်ကားပါ။ အရင်က မသိခဲ့တဲ့ အချက်လေးတွေ ဒီကားထဲမှာ သိလိုက်ရတယ်၊ ဥပမာ Sean Parker ရဲ့ အခန်းကဏ္ဍမျိုးပေါ့။ စကားမစပ်၊ သူ့ရဲ့ Napster ကို ပေါ်ပေါ်ချင်းမှာပဲ ကြားဖူးခဲ့တယ်၊ ရန်ကုန်က အန်တီလေး ရေးပေးတဲ့ စာထဲမှာ ပါလို့ပါ၊ သူက ဘယ်ကနေ ဖတ်မိတာလဲ မသိဘူး၊ peer to peer ဆိုတာ အထီးလား အမလား သူမသိပေမယ့် တူတော်မောင် အသုံးတည့်လိုတည့်ငြား စာထဲမှာ ထည့်ရေးရှာတယ်၊ ခက်တာက အီဖေကိုယ်ကလည်း ကွန်ပြူတာတောင် ကောင်းကောင်း သုံးတတ်သေးတာ မဟုတ်ဘူး၊ ဒါတွေနဲ့ ပတ်သက်ရင် သူ့နဲ့ ထူးမခြားနားပါ။ အင်း၊ လွမ်းစရာပါပဲ။

ဒီကားရဲ့ တင်ပြပုံလေးကို သဘောကျတယ်၊ ကားအစအဆုံး အမှုဆိုင်နေတဲ့ စကားအသွားအလာတွေရယ်၊ အမှုနဲ့ သက်ဆိုင်တဲ့ နောက်ကြောင်းပြန် ရိုက်ကွက်တွေရယ် ရောထွေးပြီး တွဲပြသွားတယ်။ စိတ်ဝင်စားစရာ ကောင်းလွန်းတယ်၊ ဒီလို ဇာတ်လမ်းမျိုး လန်ကြုတ် လုပ်ရေးဖို့တောင် မလွယ်ဘူး၊ အခုတော့ အရှင်လတ်လတ်ကြီး မျက်စိရှေ့တင် ဖြစ်နေတာ။ ခရမ်းချဉ်သီးပုပ်က ဒီကားကို 96% တောင် ပေးထားတာ အဓိပ္ပါယ်ရှိတယ်။ မကြည့်ရသေးသူများ ကြည့်ကြပါ။


3. The Experiment (2010) - Das Experiment (2001)

မမွန် ညွှန်းလို့ ကြည့်ဖြစ်တဲ့ကားပါ၊ မိုက်တယ်၊ ရင်တဖိုဖိုနဲ့ ရှက်စိတ်ပိုရတယ်၊ အဲလေ၊ ရင်တမမနဲ့ ရှက်စိတ်ပွရတယ် ပြောတာ၊ ဩော်၊ ရှုပ်ကုန်ပြီ။ အင်း၊ ကားနာမည်အတိုင်းပဲ စမ်းသပ်မှုတစ်ခုအကြောင်း ရိုက်ပြထားတဲ့ကားပါ။ ခရမ်းချဉ်သီး မီတာမှာ 72% ရှိတဲ့ Das Experiment ဆိုတဲ့ ဂျာမန် မူရင်းကားကို အရင်ကြည့်ဖြစ်တယ်၊ မူရင်းကားနဲ့ ပြန်ရိုက်ကားနဲ့ နှစ်ကားရှိနေရင် ဘယ်ကားအရင်ကြည့်မလဲ ဆိုတဲ့ စစ်တမ်းမျိုး ကောက်ကြည့်ချင်တယ်၊ စာဖတ်သူ အားနေရင် ကော်မန့်မှာ ဖြေသွားပါ။

၂ ကားယှဉ်ပြောရရင် ဂျာမန်ကားကို ပိုကြိုက်တယ်၊ ဇာတ်လမ်းကျောရိုးက အတူတူပဲ၊ မင်းသားရဲ့ ထောင်ထဲက ကိုယ်ပိုင်နံပါတ် ၇၇ က အစ အတူတူပဲ။ အမေရိကန်ကတော့ ယုတ္တိပိုရှိအောင် နည်းနည်းပြင်ထားတယ်၊ သို့သော် မင်းသမီးကို အိန္ဒိယပို့ပြီး ဇာတ်အိမ်ထဲက ပ ထုတ်ထားတဲ့အတွက် ဂျာမန်ကားထဲက မင်းသားကို တသသဖြစ်နေတဲ့ မင်းသမီးလောက် ဇာတ်လမ်းအပေါ် လွှမ်းမိုးမှု မရှိဘူး၊ ရင် သိပ်မခုန်ရဘူးပေါ့။ ဒါပေမဲ့ ကိုယ်လည်းလေ လောကီသားပေမို့၊ အဟမ်း၊ ယူအက်စ်ဗားရှင်းရဲ့ နောက်ဆုံးခန်းမှာ မင်းသားက လူဆိုးကို လက်သီးတွေ တလုံးပြီးတလုံး ပစ်ပစ်ထည့်တဲ့ အခန်းကိုတော့ အားကြီးကြိုက်တယ်။ ဂျာမန်ကားက လူဆိုးကို ဘာမှ မလုပ်လိုက်ဘူး၊ လူစိတ်တွေ ပြန်ဝင်လာပြီး ခွင့်လွှတ်လိုက်ကြတယ် တဲ့၊ ကတောက်။
--
လောလောဆယ် ၁၃ ကြည့်နေတယ်။